【明報專訊】現年75歲的合和（0054）主席胡應湘，可說是身經百戰，在香港、外地和國內，都曾發展大型地產和基建項目。他最近在接受明報記者訪問時，認為香港土地規劃不當，令樓價高企不下，不利香港的長遠發展。
近年樓價高企，成為社會和政治的計時炸彈，胡應湘認為：「香港最大問題，是自己以為高章的人，八十後、九十後，整彎自己，好容易受環保分子引導，以為一起屋，就是破壞環境，他們整出聲音，而規劃當局裏頭的人，則是十指不掂陽春水，只記得教科書教落，一個地方的密度要如何。」「澳洲這麼大的地方，只得2000多萬人，香港的規劃當局卻學人家的標準，而香港只有不足1100平方公里，用了的地不足20％，700萬人就踎在這只用了20％的土地，即不到200多平方公里。」
「害後生仔打成世工都買唔到樓」
「第一，用地已不多，在可用地起多一些又嘈，只能將『地價』挾貴，貴地你害不到『阿叔』，我眉精眼企，快快買了地便等，但卻害到這些後生仔，打成世工都買唔到樓，咪等同自己作賤自己？」
「你看看，自1979年開放到現在，大陸哪個發展城市，不是大了3、4倍？如上海，往時只有浦西區的一小塊，現在又浦東，閔行，乜都有；北京，六個環了；廣州，以前天河是機場，我起中國大酒店的流花橋，是打靶場來的，現在卻變了市中心區。」
「所以，香港的土地政策是失敗的，應該重新檢討，要滿足得到香港人的住屋，為何要住得這樣擠？」
胡應湘認為，土地用途是要「拗手瓜」，非常競爭性，「我哋要做國際金融中心，這要寫字樓供應，又有多少寫字樓地賣出來呢？英國佬就叻，懂『執生』，1953年12月25日耶穌誕，石峽尾大火，三萬五人無家可歸，逼住香港政府起徙置區，一路一路做，好處是低下層不用付高租金，可以積蓄，細路讀到書，讀不到書，也做個工廠仔，可以慢慢上。」
星洲密度高 住屋卻勝港「成倍」
「今時今日，香港人咁多錢，咁高收入，點解要住成咁？這樣的收入，去到澳洲、加拿大，人哋可以住到幾靚？香港住成咁，就是不肯用地。……有一樣你會覺得奇怪，新加坡人口密度比香港高，但住屋好過香港成倍，政府可以搵10個工程師，去人哋度踎1個月，學足佢啲嘢。」「用地不要咁傻，好似填海，這裏灣仔不是填出來？乜都反對，法治好緊要，好似美孚，人家買了地，可以起得，點能夠反對？好似規劃局，任佢話，可以突然唔畀起高，又不用補償。」
應派人到星洲學習
對於香港樓市，胡應湘稱唔識睇，不敢講，但就好希望後生仔買到樓。「世界冇話不勞而獲，一分耕耘，一分收穫，我1958年畢業，做了五十幾年。……樓市幾個因素，一是需求，愈多人追逐一件嘢，價錢就會上，自己收入很緊要，如果冇錢，你點能夠買？所以國民收入高，樓價會跟住高，仲有，如果買時能夠賖，銀行能夠借九成，如果唔借，價錢就低，仲有就係location（位置）。」
對於近期金融市場波動，會否擔心再有金融海嘯？胡應湘稱：「冇可能，因個個政府都驚，會團結，因不會只「辣」一個（國家），一辣個個辣，佢哋不是想團結，而是被迫團結，雖然德國在嘈，但嘈也公道，因要磅咁多水，連嘈也不能嘈？」
「冇大陸睇住 香港衰得」
他又認為，外圍環境不會令香港有事，「因大陸冇事，大陸好聰明，你外面點搞，佢睬你都傻，幾多壓力比中國，（總理）溫家寶一於唔睬你。」
「香港有這麼多的現金，又有大陸睇住，冇大陸睇，香港衰得。大陸經濟係放慢，但唔慢唔得，因而睇住inflation，而通脹一定會搞掂，因政府在收縮銀根，經濟有好有壞，正如聰明的蘇東坡話齋﹕月有陰晴圓缺。」
明報記者 陸振球
沒有留言:
張貼留言